ഡെങ്കിപ്പനിയ്ക്കെതിരെ 7 ജില്ലകളില് പ്രത്യേക ജാഗ്രതാ നിര്ദേശം നല്കിയെന്ന് ആരോഗ്യ വകുപ്പ് മന്ത്രി വീണാ ജോര്ജ്. തിരുവനന്തപുരം, കൊല്ലം, ആലപ്പുഴ, എറണാകുളം, പാലക്കാട്, കോഴിക്കോട്, മലപ്പുറം തുടങ്ങിയ ജില്ലകള്ക്കാണ് പ്രത്യേക ജാഗ്രതാ നിര്ദേശം നല്കിയത്.
ഡെങ്കി പനി കേസുകൾ കൂടിയ ജില്ലകൾക്കാണ് ജാഗ്രതാ നിർദേശം. ഓരോ ജില്ലകളും ആക്ഷന് പ്ലാനനുസരിച്ച് പ്രവര്ത്തനങ്ങള് നടത്തണം. ഇത് കൃത്യമായി വിലയിരുത്തുകയും വേണം.
വാര്ഡുതല ശുചിത്വ ഫണ്ട് ഫലപ്രദമായി വിനിയോഗിക്കണം. സംസ്ഥാനതലത്തില് ആഴ്ചയിലൊരിക്കല് ഡ്രൈ ഡേ ആചരിക്കാനും തീരുമാനമായി. ആഴ്ചയിലുള്ള റിപ്പോര്ട്ട് ജില്ലാതലത്തില് വിലയിരുത്തണമെന്നും മന്ത്രി നിര്ദേശം നല്കി.
എല്ലാ ജില്ലകളിലും കൊതുക് നശീകരണ പ്രവര്ത്തനങ്ങളും ഉറവിട നശീകരണ പ്രവര്ത്തനങ്ങളും നടത്തണം. തുടര്ച്ചയായ മഴ കാരണം പല ജില്ലകളിലും ഡെങ്കിപ്പനി വര്ധിക്കുന്ന സാഹചര്യത്തില് പ്രതിരോധ പ്രവര്ത്തനങ്ങളും അവബോധ പ്രവര്ത്തനങ്ങളും കൂടുതല് ശക്തമാക്കാനും മന്ത്രി നിര്ദേശം നല്കി.
