ചാന്സലര് പദവി ഗവര്ണര് ഏറ്റെടുക്കില്ലെന്ന് പറയുന്നത് ഭരണഘടനാ വിരുദ്ധമാണെന്ന് പ്രതിപക്ഷ നേതാവ് വി.ഡി.സതീശൻ അഭിപ്രായപ്പെട്ടു .
ഗവര്ണര് ആ സ്ഥാനത്തിരിക്കാന് യോഗ്യനല്ലാതായി. നിയമസഭ കൂടിയാണ് ഗവര്ണറെ ചാന്സലര് പദവി ഏല്പ്പിച്ചത്. നിയമസഭയ്ക്ക് മാത്രമാണ് അദ്ദേഹത്തെ മാറ്റാനുള്ള അധികാരമെന്നും വി.ഡി സതീശന് വ്യക്തമാക്കി.
ഓരോരുത്തരുടെ ഇഷ്ടം പോലെ ഓരോ പദവിയില് നിന്ന് മാറിനില്ക്കാനാകില്ല. ഇനി നിയമസഭ കൂടി ഗവര്ണറെ ചാന്സലര് പദവിയില് നിന്ന് മാറ്റിയാല് മാത്രമേ അദ്ദേഹത്തിന് പദവിയില് നിന്നൊഴിയാന് പറ്റൂ.
നിയമസഭ ഭേദഗതി വരുത്തി അദ്ദേഹത്തില് നിന്ന് ചാന്സലര് പദവി മാറ്റാത്ത കാലത്തോളം സ്വയം മാറിനില്ക്കാനുള്ള അധികാരം ഗവര്ണര്ക്കില്ലെന്നും പ്രതിപക്ഷ നേതാവ് കൂട്ടിച്ചേര്ത്തു.
സര്ക്കാരിന്റെയും വിദ്യാഭ്യാസ വകുപ്പിന്റെയും അനാവശ്യമായുള്ള ഇടപെടലുകളാണ് ഗവര്ണറുടെ പ്രതിഷേധത്തിന് കാരണം.
പക്ഷേ ചാന്സലര് പദവി ഏറ്റെടുക്കില്ലെന്ന് പറയുന്ന നിലപാട് ഭരണഘടനാ വിരുദ്ധമാണ്. നിയമസഭ നിയമനിര്മാണം നടത്തി ഏല്പ്പിച്ച ദൗത്യം അദ്ദേഹത്തിന് ഒഴിയാനാകില്ല.
