കേന്ദ്രത്തില് നിന്ന് സംസ്ഥാനത്തിന് ലഭിക്കേണ്ട പണം നല്കുന്നില്ലെന്ന് ധനമന്ത്രി കെ.എന് ബാലഗോപാല്. ഈ സാഹചര്യം തുടര്ന്നാല് അടുത്ത വര്ഷം സര്ക്കാര് ഉദ്യോഗസ്ഥര്ക്ക് ശമ്പളം പോലും നല്കാന് കഴിയാത്ത സാഹചര്യമാവുമെന്നും ബാലഗോപാല് പറഞ്ഞു.
വളരെ മിനിമം നികുതി മാത്രമുള്ള സംസ്ഥാനമാണ് നമ്മുടേത്. നമുക്ക് തരേണ്ട പണം തരാതിരിക്കുന്ന സ്ഥിതിയില് അടുത്ത വര്ഷം നമുക്ക് ശമ്പളവും മറ്റ് ആനുകൂല്യങ്ങളും കൊടുക്കാന് പോലും പ്രതിസന്ധി നേരിടുന്ന സാഹചര്യമാണ്.
പലകുറി കേന്ദ്രത്തോട് ആവശ്യപ്പെട്ടിട്ടും സംസ്ഥാനത്തിന് തരേണ്ട പണം തരാന് തയ്യാറാകുന്നില്ല. ഡി.വൈ.എഫ്.ഐ സംഘടിപ്പിച്ച കെ.റെയില് പരിപാടിയില് സംസാരിക്കുകയായിരുന്നു മന്ത്രി.
അതേസമയം കെ.എസ്.ആര്.ടി.സി അതീവ ഗുരുതരമായ സാമ്പത്തിക പ്രതിസന്ധി നേരിടുകയാണെന്ന് മന്ത്രി ആന്റണി രാജു വ്യക്തമാക്കി.
ഡിസംബര് മാസവുമായി താരതമ്യം ചെയ്താല് ഏതാണ്ട് 38 രൂപയോളം അധികമാണ് ഒരു ലിറ്റര് ഇന്ധനത്തിന് ചിലവ് വരുന്നത്. 40 കോടിയോളം രൂപയുടെ അധിക ചിലവാണ് കെ.എസ്.ആര്.ടി.ക്ക് വരുന്നത്.
ഇങ്ങനെ വരുമ്പോള് ചിലവ് കുറയ്ക്കാനുള്ള മാര്ഗം കണ്ടെത്തേണ്ടി വരും. അങ്ങനെയുള്ള ഗുരുതരമായ സ്ഥിതിവിശേഷത്തിലേക്കാണ് കെ.എസ്.ആര്.ടി.സി പോകുന്നത്.
