ഇന്ത്യയില്‍ നിന്ന് യു.എ.ഇയിലേക്ക് യാത്രാവിലക്ക് ജൂണ്‍ 30 വരെ നീട്ടി. യു.എ.ഇയുടെ ഔദ്യോഗിക എയര്‍ലൈനായ എമിറേറ്റ്സ് എയര്‍ലെന്‍സാണ് ഇക്കാര്യം അറിയിച്ചത്. നേരത്തെ ജൂണ്‍ 14 വരെയുള്ള വിമാനങ്ങള്‍ റദ്ദാക്കിയെന്നായിരുന്നു അറിയിച്ചിരുന്നത്.
എമിറേറ്റ്സിെന്‍റ വെബ്സൈറ്റിലെ പുതിയ അപ്ഡേഷന്‍ പ്രകാരം ജൂണ്‍ 30 വരെ ഇന്ത്യയില്‍ നിന്ന് യു.എ.ഇയിലേക്ക് വിമാനങ്ങള്‍ ഉണ്ടാവില്ലെന്ന് അറിയിച്ചിട്ടുണ്ട്. ജൂണ്‍ 14ഓടെ വിലക്ക് നീക്കാന്‍ സാധ്യതയുണ്ടെന്ന് ഇന്ത്യയിലെ യു.എ.ഇ അംബാസഡര്‍ അഹ്മദ് അല്‍ ബന്ന അറിയിച്ചിരുന്നു. ഇതോടെ മലയാളികള്‍ അടക്കമുള്ള പ്രവാസികള്‍ പ്രതീക്ഷയിലായിരുന്നു. ഉടന്‍ യു.എ.ഇയില്‍ എത്തിയില്ലെങ്കില്‍ ജോലി നഷ്ടപ്പെടുമെന്നും വിസ കാലാവധി കഴിയുമെന്നുമുള്ളവരാണ് ഇതോടെ പ്രതിസന്ധിയിലായത്.
രണ്ടാഴ്ചക്കിടെ ഇന്ത്യയില്‍ സന്ദര്‍ശനം നടത്തിയവര്‍ക്കും യു.എ.ഇയിലേക്ക് വരാന്‍ കഴിയില്ല. അതേസമയം, യു.എ.ഇ പൗരന്‍മാര്‍, ഗോള്‍ഡന്‍ വിസക്കാര്‍, നയതന്ത്ര ഉദ്യോഗസ്ഥര്‍ തുടങ്ങിയവര്‍ക്ക് യാത്ര ചെയ്യാം.
